0

ما بين ..الدولة العثمانية .. و تركيا

بداية معرفتي بالدولة العثمانية و الحوارات التاريخية دي
فيلم كرتون والدي جابهولنا و احنا صغيرين
و أنا لسه في أول كام سنة من ابتدائي
الفيلم اسمه " محمد الفاتح "
عن فاتح القسطنطينية
الأمير اللي النبي عليه الصلاة و السلام اتكلم عنه وقال : "  لتفتحنّ القسطنطينية ، فلنعم الأمير أميرها ، و لنعم الجيش ذلك الجيش "
و طول عمري فخورة إني مسلمة زي محمد الفاتح ده و زي عمر بن الخطاب و صلاح الدين و غيرهم و غيرهم
لكن المستفز في الموضوع
إن طول عمرنا بيعلمونا إن الدولة العثمانية دول ناس مقرفة
غزاة معتدين
سلبونا حرياتنا
بيفتوا و يفسروا الدين على هواهم
أنا كانت وصلتني معتقدات إنهم زي الشيعة صنف كده مبتدع
و اللذيذ إنهم طول عمرهم بيكلمونا عنهم على إنهم ناس كده زي بتوع العصر الحجري
مع إن الدولة العثمانية مبدأتش تختفي فعلياً غير بعد الهزيمة في الحرب العالمية الأولى
- أنا فاكرة صدمتي لما قريت مرة إن الولة العثمانية كانت مشتركة في الحرب العالمية الأولى و كان من أهداف الحلف اللي فاز تدميرها عشان يدمروا المسلمين -
يخرب بيت كده
و ما شاء الله
من ساعة فتح القسطنطينية و لحد انهيار الدولة العثمانية و بعدها كمان الأوربيين مسكوا محمد الفاتح و العثمانيين كلهم شتيمة و تلفيق و قلة أدب و مهزلة
إلا ما حد فيهم خلا عنده دم و التزم بالتأريخ العدل زي ما بيقولوا إلا قلة قليلة منهم محترمين بجد


قريت تاني كتاب عندي عن " محمد الفاتح "
مرة بعد مرة الراجل ده بيعلا في نظري و بحترمه بزيادة
الراجل ده الأوربيين الأرثوذوكس كانوا بيطلبوا منه يدخل يحكم بلادهم عشان اللي من دينهم لكن من طائفة تانية بيذلوهم و بيستعبدوهم
و كان ملقب بـ " السيد العظيم "


فرحت أوي لما أخيراً لقيت نسخة من فيلم " محمد الفاتح " - اللي عندنا على شريط فيديو - و نزلته من ع النت
الفيم إنتاج شركة عربية إسمها آلاء ليها كذا إنتاج رائع
منهم عن قطز و فلسطين و حد تاني رائع كده - للأسف نسيت الفيلم


المهم إن اللي يبقى حفيد دولة زي دي
طبيعي يطلع منه ناس زي رجب طيب أردوغان و عقول الروائع التركية - أصلي شفت حلقات من خواطر 7 السنة دي اللي فيها حاجات من تركيا


- حالياً مش هاتكلم على فترة مصطفى أتاتورك لإن اللي أعرفه عنه مش كويس و إن هو اللي كان بيسحب تركيا تجاه العلمانية فلما أقرا أبقى أشوف نظامه لكنه حتى ذلك الحين ساقط من حساباتي و مش حاطاه في اعتباري -


تركيا هي الأساس الذي تبقى للدولة العثمانية
بتاريخها المشرف الطويل
تستحق عن جدارة تاخد مكان ألف دولة و دولة بتتغنى بدورها - القديييييييييييم - في قيادة الأمم
دولة بتنهض باحترام و إجلال
دولة بتحافظ على كرامتها بحق و عن جدارة
دولة تستحق أن تكون الريادة من نصيبها
دولة " الفاتح محمد "




لما نبقى نفوق و نصحى و نحافظ على كرامتنا و اللي يستهبل معانا نديله على قففاه - أيوووة قفاه - نبقى نقول إحنا مصر يا دنيا
مش نضرب و نحابي
صباح الفل يا مصر
و صباح الاحترام يا تركيا
0

شغل عك

بسم الله ما شاء الله
البلد بقت مليانة عكاكين
طبعاً أثبتوا إن القذافي ده تلميذ متخرج من المدرسة المصرية الأصيلة للعك
طبعاً عميد الكلية أو المدرسة عمرو مصطفى
العميد الكوميديان عمرو مصطفى تحول لموضوع تريقة للركب بسبب حلقة واحدة بس - مش محتاجة نجيب لينك لإنها بقت أشهر من نار على علم
بيفكرني باتنين كده عملوا شغل آخر هبلوكا أيام الثورة ... مين مين ؟ مين يا ربي ؟؟ معلش الزهايمر يا ولاد
أييييييييوة افتكاااااارت
سيد و هناء .. و تدريبات الموساد اللذيذة
الموهييم
عمرو باشا مرة كان ساق فيها الهبل و قال على إعلان كولا 125 سنة إن أصلاً  بره مفيش حاجة اسمها 125
أنا مش فاهمة يعني قصده يعني إن الرقم بره تم إلغاءه - بس ده مجموعه مش 13 !!! مش هينحسهم يعني و كمان دول سابوا رقم 13 بجلالة قدره
و للا قصده إن كولا مابقالهاش 125 سنة أساساً
أصل لو التاني يبقى معلش صاحب اليوتيوب شوية هتلاقي إعلانات بلغات تانية لكولا بره - سبحان الله - 125 سنة
عالم عجيبة صحيح
- إلا .. هو كده مين اللي طلع أهبل ؟؟؟!؟ -


ده واحد
اتنين .. صاحب أكبر دكتوراه فخرية في الكوميديا
الكوميديان .. توفيق عكاشة
إحقاقاً للحق .. أنا كنت باسمع الاسم بس و مكنتش بحاول أعرف ده مين - و يا ريتني ما عرفت ده القذافي أرحم 60 مرة
دكترة الكوميديا عكاشة ليه مواقف و طرائف بحاولش أعدها كفاية اللي بيقع أدامي لوحده
طبعاً منها السؤال المحوري الضروري كشرط لرئاسة الجمهورية .. ربطة الجرجير بكام !! - و الله بقول لحليم يرشح نفسه بس لسه بيفكر
سؤال تاني برضه محوري - و للا كان دائري .. مش فاكرة - و ضروري للرئاسة برضه .. معرفة كيف يتم تزغيط البطة !! - حيث كده أعلن أنا " بنوتة " و من منبري هذا في موقعي هذا ترشحي رسمياً لرئاسة الجمهورية و أهم بنود البرنامج الانتخابي بتاعي .. كرسي لارئاسة هاخليه تيفال - رضوخاً لطلب العيال السيس بتوع الفيس - و هادرب كل شعب مصر على تزغيط البط من أول سن ( سنة و نص ) أو بلوغ طول ( شبر و نص ) أيهما أقرب
ده غير طبعاً الفقرة بتاعة أنا تحت أمرك يا بلد اللي عرض فيها إنه يدرس و يحاضر لـ - عد معايا - المجلس العسكري ، المخابرات العامة ، المخابرات الحربية ، أأأأ ..... كان إيه تاني
أياً كان أياً كان
سؤال بسيط

و هو انت مين أصلاً
يا ابني ده أعيل عيل بيقرا لنبيل فاروق هيقولك و هم شغلهم وقف و مستنيينك تصلحه !!!؟؟؟؟
يا ابني دي أجهزة مخابرات .. انت .. صحيييييييييييح .. بتهرج افتكرت
و اللي عايز يضحك - أو يتحرق دمه - عندكو أونكل عكاشة ع اليوتيوب - عشان أنا مقاطعة التلفزيون حالياً


في إيه تاني يا بنوتة ؟؟ في إيه تاني ؟؟
آه
لحد ما افتكر حاجة من الحاجات اللي كلنا نعرفها أو شوفناها
أحكيلكو أنا بقى
و تضحكوا معايا
كان يا ما كان
في أيام من زمان
كان في ثورة في بلد اسمها مصر
و ريسها كان مستفز
المهم واحدة اسمها بنوتة كانت ع الفيس
مبسوطة بالثورة
بتتكلم في أمان الله مع أصحابها على الثورة
لقيت أمة لا إله إلا الله عايزة تولع فيها
و حشدوا لها حشودهم المهيبة
كل واحدة من صاحبتها - ما عدا اتنين بس كانوا بيفهموا و بيتناقشوا و بيتكلموا بالعقل - قعدة تلقح بالكلام
دي قلة أدب .. إلا " بابا مبارك " .. أنا بحبه .. و اللي تكتبلها بعد حوار ع الاستيتوس " أنا بحب مبارك و ربنا يقويك " و ما إلى ذلك
يا ستي يمين .. طب يا طنط شمال
و دول تربسوا كل عقل و مخ عندهم
و كل شوية حد يقولي الخروج ع الحاكم حرام شرعاً - بأمارة اللي الصحابة و التابعين كانو بيعملوا مع الحكام الظلمة و الفجرة و ده في نوت لوحده
أو تقولي عملك إيه الراجل ؟ - هو من ناحية عمل فعملي كتير الصراحة كفاية أفلام أكتوبر اللي بستناها من السنة للسنة و خلاهم يبطلوها :D
المهم دلوقتي سبحان مغير الأحوال
الوضع اتقلب 180 درجة سبع لفات
كتر اللي بيقولوه على مبارك بيشككني في نفسي
و خد عندك بقى دعاوي عليه و حرامي و سرق البلد و أخيراً حرية و كرامة و و و و .....
هي مين اللي كانت بتقول الثورة حلوة أنا و للا هي ؟؟؟؟؟؟؟؟؟؟؟؟؟؟؟؟؟؟؟؟
لو عرفت الإجابة
سيبلي كومنت هنا 
أو ابعتها على الأإيميل التالي :
Ana_7'las_2etgannt@sho3'l_Habal.3ak


و كل سنة و انتم طيبين
0

رمضان : محاكمة و خواطر

ملحوظة و تنبيه و تنويه : البوست في كذا حاجة فالتة ، ما هو بصراحة في حاجات بتخرج الواحد عن شعوره و بيبقى " مش قادر ع الأدب "
أنا عارفة إنه مش حلو و أنا معتذرة عنه لكن أنا محتاجة أعك شوية عشان ماطقش و أفطس على نفسي
نبدأ بقى .....




أولاً كل سنة و انتو طيبين
و يعيده عليكو بكل خير و صحة و عافية
من الحاجات الجميلة في رمضان السنة دي
إن مبارك دخل ورا القضبان
دي حاجة
لكن المستفز إن يطلعلنا شوية " حاجة معرفش أسميهم إيه " يقولوا " حراااااااااااام "
حُرمت عليكو عيشتكو جتكو ستين خيبة
في واحد " كبير - مريض - ارحموه " هيقعد يهزر و يضحك مع ابنه !!!!!
و للا جايز - أنا آسفة لنفسي أولاً على التفكير في القرف ده - يقعد يلعب في أنفه - أكتر حاجة رحيمة بالذوق
بذمتكو و دينكو يا مؤمنين
ده تصرف من رئيس !!!!!؟
لأ و الكارثة إنه رئيس 30 سنة
إيه يا جدعان
مبهتتش عليه بروتوكولات الذوق ؟؟!!!!!!!!؟
ده احنا البيبي لما بيعملها بنقوله " كخ كده غلط "
- حد يقوله يا جدعان كخ جايز جاله زهايمر .. تصدقوا فعلاً " حراااام عليكو " -
و بذمتكو كمان ... واحد - زي ما ظهر - مش قادر يقعد - يا عيييييييني - هيترزع قاعد زي البني آدمين تحت إيد حلاقه عشان يصبغ شعره
- هو عموماً خسارة فيه الشيب أصلاً ده  ربنا قال عليه وقار أو حاجة بالمعنى ده -


دي كانت نقطة
تاني حاجة
اتفرجوا على الحلقة الرابعة من برنامج خواطر 4
مؤسسة سعودية يا جدعااااااان هي اللي تبني بيت لصاحب أرض في الأحياء التعيسة !!!!!!!!!!!؟؟؟؟؟؟
إلهي يجحمكو يا بُعدا .. إلهي يجحمكو و لا يوريكو نعيم لا دنيا و لا آخرة
دي عيشة أصلاً ؟؟؟؟؟
اتفضلوا ....




حد بقى .. ابن حلال عاقل ضميره صاحي
يقولي بعد المناظر دي - ده غير اللي مالهومش أرض أصلاً و عايشين مع القبور
بأي وجه و أي حق يكون في " بني آدم " كان أو - و المستفز - لحد دلوقتي بيحب مبارك و كلابه ؟؟
أفهم بس
يا ريت بقى حد من اللي كانو عاملينلي مبارك خط أحمر أيام الثورة يشوف الفيديو و يرد عليا
عايزة بس أفهم يعني
أنهي ملة و للا منطق يقول اللي يسيب ناسه كده نحبه و تموت في فروة دباديبه !!؟
- أصل حرقة دمي أيام الثورة مكنتش قليلة برضه -


أنا دلوقتي مش طالبة عقاب مبارك
موافقة هو و كلابه تتحدد إقامته في أي داهية
لكن أشوفكو يا بعدا يوم القيامة شايلين ذنوب 80 مليون شخص- خلينا نقول 5 بيحبوهم و مسامحين - و بتصوتوا و تولولوا في قعر سقر مش بس جهنم
إلهي أشوفكو شايلين كل ذنوبي يا بُعدا أنا و كل أهلي و قرايبي و معارفي




عزيزي عديم الذوق و الضمير و الدم
أنيل  رئيس سمعت عنه مصر
الرئيس الأسبق المخلوع سابقاً المتهم حالياً / مبارك
و مبارك بس
لإن أبوك مات متبري منك يا ... و للا خلينا محترمين مش زيك
مش هتشمت فيا يا " أبوهم "
لازم تعرف إني خلاص شوفتك على حقيقتك جوا القفص
حقير قذر لا علاقة له بأصول الذوق و الضمير
فخلاص بقى
مش معترضة تخرج تاخد تحديد إقامة بس إنت و كلابك
لكن متفرحش أوي كده اتوكس
اسمعني الأول للآخر
يوم القيامة أنا حقي قصاده تاخد ذنوبي كلها يا كميلة و شيل بالشفا
- أنا و أبويا و أمي و أخويا و إخواتي و جدي و جدتي و زوجي و جدي و جدتي التانيين و خيلاني و كل قرايبي و معارفي -
و بالباقي من بلاويك أسمع صوتك يطربني و هو واصلني من سقر
أو هاطلب راديو " دقة قديمة بس حلو " إذاعة مخصوصة لصوتك و أتمزج بيه
مع خالص استحقاري و حسبنتي عليك
بنوتة مصرية
أبوها اتغرب بعيد عنها
و سافر و سابها تاني يوم فرحها
و مش مسامحه في حقه و لا حقها و لا حق أمها و امخواتها في بُعد أبوها عنهم
و اشرب يا معلمنا القباحة من ده كاااااااااااام مليون
و الله الموَّفِق
- انطقوها عدل بقى كفاية فضايح العسكر اللغوية -
0

لِبْس لله ... عباية فستان بلوزة أي حاجة

قربت أبوس إيدين بتوع اللبس و الهدوم
نفسي ألاقي حاجة عدلة في البلد دي تيجي على مقاسي
يخرب بيت كده
هو احنا مقاساتنا مش موجودة ليه يا جدعان !!!!!!!!!!!؟
ده المانيكانات زينا
و الخليج فيه لبس مقاساتنا
اشمعنا البلد دي ؟؟؟!!!!!!!!!!!؟


عشان محدش يقولي إني انتطسيت في نظري و مبدورش عدل
عدوا معايا
وسط البلد = تحرير و طلعت حرب و ما حولهما ... و نزلته
                يوليو ده اللي على ناصيته دار القضاء و آخر مترو العتبة ..... نزلته
الهرم .... و نزلناه راخر
المهندسين = شهاب .. محي الدين أبو العز .. نادي الصيد .. جامعة الدول العربية ... كلهم و نزلناهم
فيصل ببص و أنا راكبة المواصلات
إني ألاقي حاجة عدلة
مفيش
طب حاجة أصلاً مقاسي لو قولت أجرب حاجة
برضه مفيش
اللــــــــــــه
إيه يا جودعان !!!؟
هو احنا مغضوب علينا ؟؟
علينا جرايم ؟؟؟
طب و الله العظيم لسه مستلمة الفيش الخميس اللي فات
كان أبيض و زي الفل
- فيما عدا صورتي اللي على رأي حليم لا تدل على إن دي واحدة مالهاش سوابق ... حسبي الله و نعم الوكيل في الكاميرات الأبيض و اسود النيلة بتاعة الحكومة .. بطايق و أقسام .. يععععععععع -


دي كانت المقاسات
نيجي بقى ع الموديلات
هو أنا كفرت لما قولت إني عايزة فستان و جاكت جينز ؟؟؟!!!!!!!!!!!!!!؟
طب قولولي أرجع في كلامي !!!
عايزة فستان يوحد ربنا من غير أساتك في ضهره أو وسطه و انا هشتريه إن شالله يكون معمول من ستارة قصر محمد علي بس مفيهوش أساتك


طب عباية !!
محدش يقولي فيها كفرانية بقى
عبايات من اللي كانو عاجبني
كلهم - سبحان الله يا أوختشي - اختفوا من المحلات
تقولوشي كَلهم الوبا !!!!!!!!!!!!
لأ و إيه !!! - اضحكوا اضحكوا -
لاقيت عباية عجبتني عند محل - بدون ذكر أسامي - سوزانا أبو ورداية بمبينو على الجنبينو
و آآآآل إييييييييييييه
طلعت ضيقة
قولت خير
يبقى أخيراً في حاجة مش هجيب أصغر مقاس فيها
نجرب الأكبر لو سمحتي يا أوختشي
- الأكبر كانت اللارج .... و انتو تخيلوا بقى -
مش أقل من إنها محييييييييييييييييييييييييط عليا
ياللا مش جديدة


أملي الوحيد دلوقتي
أنزل شارع فيصل
لعل و عسى
تفتكروا هلاقي فساتين خروج و عبايات حلوة كده و لذيذة و للا برضه هيبقى نفس الموال الأبيضاني ده !؟؟؟؟؟
أبوس إيديكم عايزة فستان و جاكت جينز أو عباية
لو في الاتنين يا ريت
بس مش هابقى طماعة




و في الختام
محدش عنده فستان حلو كده سلف ؟؟؟
0

إنسان + تسامح و للا ؟؟؟

كتير بفكر مع نفسي
أو بتكلم مع زوجي

تقدر تسامح مبارك و سوزان و نظيف و عبيد و العادلي و غالي ؟؟؟؟؟؟؟

" يا ابن الوطن و النيل .. كلك أسى و جروح
دمع الجرس بيسيل ... صوت الآدان مجروح "

تقدر تنسى كل العذاب اللي الناس عايشة فيه ؟؟
اللي انت بتشوفه في الشارع رايح جاي ؟؟؟
اللي انت طايلك منه نصيب حلو ؟؟

" تذكرتي رايح جاي "
أنا أعرف تذكرة رايح
الجاي مؤجل إلى ما شاء الله
هي تذاكر مش تذكرة واحدة بس
ليه ؟؟؟؟؟؟؟؟
ليه الراجل يتبهدل بعيد عن أمه و أبوه و مراته و أولاده اللي محتاجينله ؟؟
ليه الولاد يكبروا بعيد عن أبوهم ؟؟؟
ليه الناس تتعب من أحوال البلد و يجيبلها ضغط و سكر و غيره ؟؟؟

" بلدي يا بلدي و أنا نفسي أروح بلدي "

ليه الناس أخلاقها تسوء و متبقاش طايقة و لا حتى نفسها ؟؟؟
ليه الناس بتعيش في المقابر و تشحت ؟؟

حاجات كتيييييييرة أوووي

" هنسى أحزاني و أفرح .. ده بجد الفرحة لسه .. واحشاني
فيها إيه لو تبقى لحظة حلوة .. واخداني "

أيوة هاضحك و أفرح و أغني و أعمل كل حاجة حلوة في الدنيا
لكن مش قادرة أسامح
لا هاسامحه
و لا هاسامح المسئول اللي يتسامح معاه و يضيع حق ملايين
أنا قلبي اسود
و مش مسامحه
سفر - مستشفيات - خارجية - داخلية - تعليم - الشغل و الفلوس
مش مسامحه

" ياما نفسي أكون إنسان ..
كل اللي بردانين ف كفوفه يدفوا "
0

خلااااااااااااااااااص ... كفاية بقى كده

أكتر عنوان كتبته في حياتي و حسيته معبر عني أنا أكتر من الكلام
خلاااااااااااص بقى كفااااااااااااااية
دماغي بقت بتدق لما أفتكر
بطلت أقرا جرايد
بطلت أشوف الأخبار
قايمة الأخبار في الرسيفر مبقتش بفكر أجيبها
لا تقولي بقى قناة تحرير و لا مصري ة و لا نيل و لا نيلة حتى
دماغي بتونننننننننننننننننننننننننن

نفسي أفهم في إيه ؟؟
و ليه - بالمرة يعني ؟

ليه المحاكمات سرية و ممطووووووووووووووووووووووووووووووووووووووووووووووووووطة و لااااا كأن البلاوي دول عملو حاجة "وحثة " في حياتهم خالص ؟!!!!!!!!!!!!!!!!!!!!!!!!!!!!!؟

ليه المجلس العسكري و د. عصام شرف و الحكومة كلها بقيت بحس إن حسهم هااااااااااااااااااادي و رتمهم أهدى !!!!!!!!!!!!!!!!!!؟؟

يا جدعااااااااااااااااااااااان
نفسي حد يفهمني بالراحة كده إيه اللي بيحصل في البلد قبل ما أحس إن بيني و بين إني أتبرى من البلد و اللي فيها شعره بس

آآآآه يا نافوووخي
xS
0

ساعات بتبقى " أحياناً " .. و ساعات بتبقى " دايماً "

أحيانا نبحث عمّن رحلوا عنا في السماء..نمنّي النفس..علّنا نحظى برؤياهم..!ـ
عجبتني أوي
و وجعتني أوي
0

اللهم لا شماتة ... و لكن

بصوا بقى
أنا بحاول أبعد نفسي عن إني أشمت
لكن بجد بقى
أنا بدعي ربنا بجد من قلبي
إن ربنا يمد في عمر مبارك لحد ما يشوف شوية من الذل اللي ولاد البلد شافوه على إيديه
لحد ما يتحاكم و يتحكم عليه
يدوق الذل
يتحكم عليه بالسجن
و يشوف بس باب السجن من جوه و هو بيتقفل عليه
و مش فارقه بقى
سجن عادي و للا حتى سجن سبعتلاف نجمة
المهم بس يشوفه من جوا

أينعم أنا مدوقتش الذل ده بنفسي
لكن عمري ما أنسى مناظر الناس اللي مش لاقية مكان و نايمة على حتة كرتونة في الشارع في عز البرد
العيال اللي بيلموهم و يسرحوهم في الشوارع عشان أهاليهم مش لاقيين شغل و كلهم عايزين ياكلوا
لما ألاقي راجل عجوز بيتزق و يتضرب و مش عارف يركب مواصلة
و يبقى الكل مش همه غير على نفسه
لا فارق بقى بنت و للا راجل و للا ست كبيرة و للا أم و معاها عيالها
خلانا كل واحد بيقول نفسي نفسي و يولع اللي ورايا
رغم إن قبلها كان لما اللي ساكن في أول شارع يتعب يجري عليه اللي ساكن في آخر الشارع
الفترة اللي فاتت دي قولولي كام واحد كان يعرف أسامي جيرانه اللي معاه في العمارة
و للا حتى أسامي أفراد العيلة اللي ساكنة في الدور اللي تحته

بصوا بقى كلاكيت تاني مرة
اتقالي إن أحسن حاجة نعملها في حقه إننا ندعي عليه ربنا ياخده و يحاسبه على كل حاجة
أنا و الله ما أحب عليا من إني أشوفه يوم القيامة بيبدي الندم على البلاوي اللي عملها هو و اللي "كانوا" معاه
- عشان كلهم دلوقتي هيبعوا بعض -
لكن بصراحة
عايزة قلوب الناس - و أنا منهم - ترتاح
أنا ليه ؟
عشان قلوبنا اللي ماتت من كتر اللي كنا بنشوفه
أخلاق الناس اللي مبقتش باعتها
السموم اللي كلنا كبير و صغير  .. مقتدر و فقير بناكلها صبح ليل
عشان المية الـ-معلش يعني -ـمعفنة اللي بنشربها
- حد بذمتكوا يقولي فرقنا إيه عن الناس اللي بتغسل هدومها و تستحمى في الترع و ترمي زبالتها فيها و ترجع تشربها و الحاجات اللي كانو بيقولونا عليها " كخة و وحشة و ياي " دي -
جسبي الله و نعم الوكيل فيهم
كمان حاجة
الجنيه اللي كلنا معاه الذل
ابنه يسحب مخزون دهب مصر في أمريكا
حسبي الله و نعم الوكيل فيك يا بعيد
يعني لولا الننوس الكتكوت الـ" حنواني " ده
كان زمان الجنيه حاله دلوقتي - على الأقل - أرحم من اللي هو فيه دلوقتي
ده المفروض يولعو في مبارك و عياله و مراته و يحطوا مكانه في العناية الجنيه

أينعم أنا مش عايزة أشمت
لكن برضه عايزة أرتاح أنا و الناس كلها
عشان كده ربنا عمل القصاص
" و لكم في القصاص حياة يا أولي الألباب "
 مهما عملنا فيه
مش هنخلص حق التلاتين سنة اللي فاتوا
لكن برضه هافضل أدعي عليه
حتى لو اتعمل فيه و للا حصله إيه
هافضل أدعي برضه
حسبي الله و نعم الوكيل
اللهم أنت حسبنا فيهم و نعم الوكيل فأرنا فيهم آياتك و عجائب قدرتك و اجعلهم عبرة لمن لا يعتبر
2

يوم في عمري

هو آه يوم واحد من اياااام عمري
بس هو مش أي يوم
3-3-2011
الكل اتجمع و بيبارك
و كل أحبابنا ويانا
ما أحلاها الليلة السهرانا
يوم غالي عليا
بكل تفصيلة فيه
بالوضع العجيب اللي كنت فيه فترة الضهرية قبل الكوافيرة
فترة الصبح اللي أراهن إن مفيش عروسه تعمل فيها اللي أنا عملته
- أنا مفيش مني اتنين .. كفاية ع الدنيا أنا واحدة -
^ـ^
بأحلى فتراته من أول الساعة 7:30 مساءً
- اللي كان المفروض تكون قبلها بحوالي ساعة -
ما هو كل العرايس بتتأخر إشمعنى أنا يعني ؟؟؟؟!!!!
ما هو في الخطوبة كنت في معادي موجودة
الله !!!
:D

بجناني في الكوافيرات اللي لفيت عليهم
- أنا أعرف إن العروسة تريح دماغها و تتفق على كل حاجة مع كوافيراية واحدة و خلاص -
لكن ميييييين أنا مفيش مني اتنين
:D

المهم إن آخر واحدة قمت معاها بالواجب و جننتها
كل ما تقولي هاحطلك حاجة .... لأ
طب دي ..... لأ
طب أعملك كذا .... برضه لأ
" أمال انتي جاية المفروض أعملك إيه ؟؟؟ "
ده كان سؤالها آخر ما جننتها
ندخل ع الطرحة بقى
بتقولي امسكيها ع الطول اللي انتي عايزاه
و أنا أشد لتحت و هي تشد لفوق
- مع واحدة من صحباتي حسابها معايا بعدين -
:D

المهم إن اليوم كان حلو
حاجات بحبها
و حاجات برضه بحبها بس باضحك عليها
اليوم كله بحبه
3-3-2011
حاجة كمان
كان عيد ميلاد ماما و عملتلها حاجة خلتها بقت فرحانه أووووي
و دي حاجة باسطاني أووووووي
^ـ^
JUST MARRIED

0

دي كمان وجهة نظر برضه .. الحب

قريت " حالة " على الفيس بوك لصفحة " ثقف نفسك "
كاتبين
" في الحب واحد زائد واحد يساوي واحد "
أو حاجة بالمعنى ده


هي ليها منظارين
ممكن تكون صح
من الناحية العاطفية و المشاعر و الحواديت دي كلها
إن الانتين كل واحد فيهم عايز يرضي التاني و يسعده
فكل واحد بيحاول يقرب من التاني
و " احنا روح واحدة في جسمين " و إلخ إلخ إلخ من هذا القبيل


من ناحية تانية
اللي هي المنطقيه و بالعقل
- و اللي المفروض تساعد أي حب على إنه يعيش -
الجملة دي غلط
واحد زائد واحد حتى في الحب يساوي اتنين
مهما كان
برضه اتنين
لإنهم مختلفين
و هي كلمة
مختلفين
أقلها
هو راجل - ذكر
و هي بنت - أنثى
- حد يقولي إزاي " ذكر + أنثى = حاجة واحدة "
مظنش في مسمى للحالة دي !!!


و على فكرة
أنا ضد مقولة أو فكرة إن الأقطاب المتنافرة تتجاذب و إن الواحد بيميل للمختلف عنه
مستحيييييييييييل
- أو على الأقل في رأيي يعني -

واحد بيحب اللون الأزرق
مش هيموت أو يتعذب لو حب واحدة بتفضل اللون البرتقالي

بس أكيد مش واحد اجتماعي أوي
هيقدر يتأقلم مع واحدة انطوائية أوووووي
- واحد فيهم هيطق و يموت يا جدعان -

و هي دي الفكرة
المساحات المشتركة مهمة أوي - ودي مافيهاش كلام
لكن انعدام المساحات الخاصة ده كاااااااااااارثة

و اللي قرا كتاب
" رجال من المريخ و نساء من الزهرة "
الراجل بيحتاج في فترة يحس بانفراده و يدخل كهفه
( """" لوحده """")
و حطوا تحتها ألف خط
لوحده
مش مع حبيبته
أياً كانت

حاجة كمان
المفروض ن احنا عندنا عبادة اسمها " عبادة التأمل "
يعني الواحد يختلي بنفسه مع ربنا
يتفكر في خلق الله
" لوحده "
- على الأقل غالباً -
و سيدنا محمد عليه أفضل صلاة و أتم تسليم كان ليه منهجه فيها
و منهج رائع جدااااااااااااا طبعاً
يختلي بنفسه بعيد عن بيته و أحب نسائه لقلبه و عن الناس كلها

حاجة كمان تاني
كام واحد فينا بيحتاج يقعد مع " نفسه " و " لوحده " كل فترة عشان يعيد حساباته ؟؟
تلاقي نفسك بتقلب المواضيع كلها في باله و يقلب عاليها واطيها و يفنطها و يفرزها و كل ده ؟؟
انا بحب ده أوي كمان

حلو إننا نقول للحبيب " أنا و انت واحد "
لكن إننا نصدقها مليوووون في المية
معلش
بحس إنه جنان
من نوع مبحبوش
انت ليه شخصيتك
و هو ليه شخصيته
بتحبه و بيحبك
بس مينفهش هو يمسح شخصيته عشان يبقى معاك = واحد
و مينفعش انت تمسح شخصيتك عشان تبقى معاه = واحد

على الأقل
ده رأيي
مجنون مش مجنون متهور عاقل
صنفوه زي ما تصنفوه
بس هو ده

--------------------------------------------

التدوينة دي قديمة و من فترة في المسودات
بتاريخ 11 يناير 2011
^ـ^
0

30 مبرووووووووك


ألف 30 مليوووووووووووون مبروووووووووووووووك         
   مش هاقول حاجة اللي شايفينه كفاية                                 
    امبارح كنت في التحرير                                              
    و بجد الأغنية دي بتجيب حاجات من اللي جوايا جدااا                 
   بلدي بحبها                    ----                                        
    يا سلام على أهل بلدي                                                  
   ^ـ^       
   |                                      |   
   |                                      |   
                                               


0

مشروعية أو شرعية الخروج على الحاكم عشان كنت اتسألت فيها

كلام في الخروج على الحاكم
أولاً
من الشروط اللازم توافرها في الحاكم
الإسلام - ماشي
ميبقاش ست - ماشي
الكفاءة ( إنه راشد و واعي و بالغ ) - ماشي
العدالة - فين و منين ؟؟
العلم ( إنه يكون عالم بمسئولياته و يقوم عليها ) - ألطف رد سمعته من المعترضين على المظاهرات إنه مهتم بالشئون الخارجية و سايب الأجندات الداخلية للي حواليه و بكده انتو اللي أسقطوا عنه توافرالشرط ده

الخروج على الحاكم بقى
قريتلي شوية معقولين على قد ما أقدر لإن أكيد أنا مش في مكتبة حالياً و أول ما أقدر هانزل المكتبة و أكد اللي بقوله
أولاً
اللي بيقولي الخروج على الحاكم حرام
طب سؤال بقى
فرحانين اوي ليه بثورة 1952 ؟؟؟؟
هي مش كانت انقلاب عسكري و خروج على الحاكم ؟؟؟
و محدش يقولي حاكم أجنبي
ده مصري لإنه اتولد و عاش في مصر
و بقلهم أد إيييييييييييه في مصر ؟؟
ده أقل من ربع الزمن ده يدي الشخص الجنسية
و مش برضه " ما بني على باطل فهو باطل " ؟؟؟
يعني حكمه هو كمان باطل
ده بالحجة بتاعتكو يعني

ثانياً
حكم الخروج على الحاكم الظالم الجائر
ناس كتير بتقول إنه حرام
لكن اللي لقيته بقى
إن أصلاً الأئمة الأربعة قايلين بيه
الإمام مالك دعا الناس لبيعة خليفة تاني غير المنصور و لما قالوله احنا مبايعين المنضور كان رده
إنما كنتم مكرهين وليس لمكره بيعة
دي حاجة
حاجة تاني
مذهب سيد الفقهاء أبي حنيفة – رحمه الله - : فالمشهور من مذهبه جواز قتال حكام الجور والظلمة، والقول بالامر بالمعروف والنهي عن المنكر بالسيف
- هاتاكد منها برضه من الكتب -


و عبد الله بن الزبير
مش كان خارج على معوية ؟؟؟
ده كافر يعني و للا إيه ؟؟
و الناس اللي خرجت على الحجاج ؟؟؟
زي سعيد بن جبير و غيره
ما احنا دلوقتي بنقول عليهم أبطال و نصروا الحق
رغم إنهم خرجوا عليه و الموضوع وصل لإنهم حاربوه بالسيوف


ده ردي على موضوع الشرعية و حرمة الخروج على الحاكم
0

رداً على اللي بيتقالي أو بسمعه

قاعدة أرتب في دماغي أقول إيه ؟
و إيه قبل إيه و حاجات و كده
لإن أكيد المرة دي مش هينفع يبقى مجرد كلام أو فضفضة
بس كان في كام نقطة كنت عايزة أبدأ بيهم
و أنا بدور عنهم اكتشفت حاجات تانية
فطبعاً كل اللي كنت بفكر فيه رجع تاااااااني و اتسنفر
عموماً
أنا هامشي في كلامي بإني هارد على الكلام اللي كان بيتقالي الأول
و بعدها أبدأ في بيان " مشروعية " أو " الشرعية " اللي عندي
نبدأ
بسم الله

بيتقالي :

عملوكوا كل اللي انتو عايزينه ، عايزين إيه تاني ؟؟
- ده معملش حاجة
طلع يعني نائب و يشيل " كام " وزير من الحكومة و شال رئيس الوزرا ؟؟؟
فين إلغاء الطوارئ ؟؟؟!!
فين إنه يؤمر بنزول الداخلية و انها تتعامل مع الناس باحترام مش بقلة أدم و بلطجة و آخرتها الخيالة و المولوتوف و العربيات اللي بتدوس الناس و أسلحة محرمة دولياً ؟؟؟!!!!!!!!!!؟
و بعدين احنا مطلبناش إنه يعين نائب
الموضوع ده اللي قبلنا طلبوه و هو لاااااا كإن في حد عايش في البلد أصلاً
اللي هيقولي كده تاني
ده معملش حاااااجة

هيحصل فراغ دستوري و البلد هتبقى فوضى و حرب من غير رئيس و بتاع
- روحو اقروا الدستور اللي هيعمل فراغ الأول و بعدين تعالوا قولو هيبقى في فراغ و للا لأ
و تسهيلاً عليكو هجيبلكو لينك الدستور و رقم المادة كمان كمان شوية
بس هقول تاااااني
الدستور محدد مين هيمسك مكان الرئاسة لمدة شهرين و اللي هيمسك مش هينزل الانتخابات
يعني من الأخر
حجة باطلة

لازم يكون في رئيس عشان يطلب تعديل الدستور
- ليه إن شاء الله ؟
هي دي كمان حصري للرئيس المصري و للا إيه ؟؟
الدستور برضه قايل إن حق طلب تعديل الدستور لرئيس الجمهورية و مجلس الشعب
و قبل ما حد يقولي " ما انتوا بتطلبوا حل المجلسين عشان باطل "
انتو رضيتوا و قبلتوا بمجرد إن الأعضاء المطعون فيعضويتهم يلتزموا بقرار المحكمة في الطعون
يعني سيبولنا احنا الكلام و التحجج ببطلان المجلس

بالنسبة بقى للأخبار اللي بتيجي
أعمال التخريب موجودة من أول يوم الثلاثاء 25 يناير و موقفين الطريق و الدنيا
- بأمارة المحلات اللي كانت فاتحة و بتنزل اكل و شرب للناس المتظاهرين
و بأمارة الفيديوهات اللي شوفناها للمظاهرات في شارع رمسيس عند المحكمة في الإسعاف
اللي لما بتيجي عربية بيوسعولها

حرام الناس اللي بتموت دي
- و مش حرام اللي ماتو في الاقسام و في تفجيرات الكنايس و الفتن الطائفية ؟؟!!!!!
مش حرام خالد سعيد و سيد بلال و غيرهم و غيرهم
مش حرام المعاملة الحقيرة للناس في كل حتة و كل لجنة على إيد بتوع الداخلية ؟؟؟
و للا دول كمان هتقولوا عليهم سارقين لبس الداخلية و الونش و كشك العسكري و شمسية و ترابيزة و كراسي ؟؟؟
جايز برضه

مش عايزين تدوا الراجل فرصه ليه ؟؟ كلها كام شهر و يمشي
- كام مرة وعد و موفاش بوعده
ده حتى الناس بيقولوا لبعض " خليك راجل و أد كلمتك " و " كلام رجالة " و كلنا عارفين الكلام ده حتى البنات
و بعدين ده من أول ما مسك قال مش هيترشح الفترة التانية المسموح بيها دستورياً - ساعتها
و رغم كده أديه منور أهه
- آخر معلوماتي و اللي مكتوب في الدستور إن المدة الواحدة 6 سنين بس .. مش 30
يا سبحان الله
و بعدين ده ملغاش الطوارئ
يعني لو سكتناله ممكن يقوم علينا كمان نص ساعة كلاب الداخلية و شغل البلطجة و الفتونة بتوعهم
- ده شفيق طالع يعتذر و الضرب شغال في الميدان من البلطجية بتوعهم -
و مش فاكره مين بس حد جامد قال إن البلطجية دول بتوع صفوت الشريف
و رئيس تحرير اليوم السابع قدم أوراق تثبت مين صاحب اللعب القذر ده و اللي نزل البلطجية للمتاظهرين

البلد بتضيع
- ليه ؟ تاهت من بابي و للا إيه ؟
البلد اللي عمرها أكتر من 7000 سنة
مش هتموت من أسبوع و للا اتنين
ممكن نخفض الأكلة اليومين دول و كده الوجبة الواحدة ممكن نقسمها 3 وجبات لو خايفين أوي كده

طب افتكروله إنجازاته
- أنهي ؟؟؟
الديون اللي ضربت في العالي ؟
و للا كل حاجة اللي بقينا نستوردها من بره ؟؟
و للا الغاز اللي بيتصدر لإسرائيل بتلت السعر اللي احنا بندفعه ؟؟؟
ده حتى احنا عندنا مثل بيقول
" حجا أولى بلحم توره "
و اللي هيقولي سلام
سلام إيه ؟؟؟
سلام إيه ما انت بتطاطي راسك لليهود و الأمريكان
و بتروح تشحت منهم
لو هتقولي الحكومة بتعملنا خدمات
أوك فلنفرض إنها يتقدملنا خدمات فعلا
هم جايبين فلوس الخدمات دي منين بقى ؟؟؟؟
أقولك أنا
من المعونات - التسولية - الأمريكية
يعني من الآخر بيشحتوا علينا
و آل إيه
" مصر بلد غنية . بثرواتها الطبيعة و البشرية "
إيه ؟؟
مش كنتو بتاخدو ده في الدراسات ؟؟؟؟
و باقي إنجازاته سارة درويش ظبطتها جامد و هجيبلكو اللينك برضه


الشباب في الشارع و كل الرجالة الكبار
- و الرجالة الكبار ليه تحت ؟؟؟
هو مش الشباب واقفين ؟؟
أمال الشباب نزلوا ليه ؟



الناس خايفة تفتح
- ليه إن شاء الله ؟؟
خايفين من الجيش و للا من لجان الحماية الشبابية الشعبية ؟؟؟
أفهم يعني

الأكل هيقل في المحلات
- و هو لازم لحمة و فراخ كل يوم في الغدا و ع العشا لانشون و زتون أسباني ؟؟؟
خدنا ع الدلع و خلاص
آه ممكن يكون في حاجات نقصت
لكن أكيد موصلناش لمرحلة إننا مش لاقيين مية و أكل و دوا زي ما الناس التانية كانت عايشة
اللي في العشوائيات و المناطق الفقيرة
نبطل دلع شوية


الناس في المظاهرة وقفوا حال البلد
- ليه إن شاء الله ؟؟؟
هم  كانو هم اللي " قبضوا " على بتوع الداخلية و منعوهم من ممارسة أعمالهم ؟؟؟
و للا يمكن هم اللي وقفوا القطارات ؟؟
و للا استنوا استنوا
يمكن هم اللي قفلوا البنوك ؟؟؟
جايز برضه



لأ بجد كلام كتير بسمعه و مش فاهمة بيتقال ليه ؟؟

عموماً
اللي بيسمع كلام تاني يقولي عشان أقوله الرد عليه كمان
0

انت بيع .. و أنا هاشتري

تبيع كرامتك بكام ؟؟
تبيع دم أخوك اللي مات بكام ؟؟
خالد سعيد و سيد بلال ؟؟؟
و كل اللي ماتوا في الكنيسة و الجامع ؟
تبيع دمهم بكام ؟؟
عشان السعر اللي انت هتقوله
أظن احنا نقدر نشتري منك باللي تقوله
و من غير فصال و هانزيدك كمان 
و ساعتها بقى
 لما ننزل نثور
لما نعدي كباري و جسور
متقولناش كفاية
انت بعت
و احنا اشترينا
و مش هنمشي غير و حقنا
حقنا و حقهم بين إيدينا
كل واحد يعمل اللي يقدر عليه
و مفيش حرب من غير تمن
مفيش كرامة من غير تمن
دي حتى جنة آدم كان ليها تمن
مقدرش عليه ربه متتمش المبيع
لما مدفعش ربه قاله مش ليك
قولتلك تمنها و مدفعتهوش
جزاتك تتعب و تشقى لحد ما تكمل تمنها
انت بقى
تمن حياتك كام ؟؟
تمن دمي عندك كام ؟؟
انت بيع و انا هاشتري
بورصة و أسهم و آدي الفجر قرب ينجلي
انت بيع و انا هاشتري
و بكرة ييجي
بكرة ييجي وياه صباح
يمحو بنوره كل الصياح
و يرجع بعدله كل اللي راح
انت بيع و انا هاشتري
0

أجدع ناس

أجدع ناس و أجمل شباب
محدش على سطح الأرض كان متوقع كل ده
بجد دي ثورة
لعب العيال اللي كنا مستنيينه
مش ولاد و شباب مصر الرجالة هم الي عملوه
دول برفيسورات التخلف و الغباء " النظام الحاكم " و الحزب هم اللي طلعوا أعيل من العيال و نازلين هاتك يا استعيال
بجد أنا مبسوووووووووووووطة جداااااااااااااا إن دول أهلي و ناسي
أول مرة أكون فخوووووورة بالشكل ده من قلبي إني مصرية
إحساس محستش بزيه قبل كده
نفسي أصرخ " أنا مصرية يا بشررررررر .... أنا مصرياااا "
و نفسي جداااااااا أكون في مصر و في التحرير كمان
" ليه يعني يعملوا دمية إعدام مبارك من غيري ؟؟؟ إزااااااااااي ؟؟؟؟؟؟؟؟ "
دي أقل حاجة كان ممكن أعملها لو أنا معااااااهم .. عااااااااااا
أنا عايزة أنزل معاهم
حاجة كمان أنا ممكن أعمل شاي و قهوة و أي حاجة و أنزل أكل للشباب اللي كان واقف يحمي البيوت بعد ما الدخلية " استندلوا و طلعوا جبنى و خونة و حبة عيال مالهومش لازمة " و اختفوا و سابوا البلد للكلاب اللي طلقوها على الناس
أنا قبل كده مكنتش مصدقة إن الشباب يقدرا يثبتوا إنهم و إننا مش أي شباب هفأ و هوا
و قولت لو عملوا بجد و أثبتوا إنهم رجالة هاعترف إني كنت غلطانه
آه
أنا بحب الناس القوية الـ " رجااااااالة " الجدعة دي
و باعتذرلهم عن اللي قولته في حق الشباب اللي نزل و قام و قال أنا راجل و كلمتي أهي
لكن برضه رافضة للي ولعوا في نفسهم
عموماً نسيبنا منهم و من الكلام العيالي دي


بجد بجد
شكراً لكل " راااااااااجل " رجعلنا إحساسنا بالأمان
يمكن تفكير أهبل شوية
بس أنا بجد بقيت حاسة إني ممكن أمشي قي الشارع بحب لكل اللي في الشارع من غير ما أخاف من حد أو شاب إنه يغلط أو يستهبل أو يعاكس أي بنت فينا
بجد إحساس كانت كل بنت افتقته من فترة
أول مرة أحس إني متأكدة من الرجولة المصرية زي ما أنا حاسة و متأكدة منها دلوقتي


حاجة على جنب مهمل لإنها عن ناس متستاهلش بس عايزة أقولها
في شوية كائنات محسوبة علينا مصريين
مالهومش أي كرامة و لا دم
ناس حثاااااالة و ملهومش غير كده
جبنى و فعلاً ميتقالش عليهم لا مصريين و لا بني آدم عنده دم أساساً
ممثلين كتير و بتوع الكورة طبعاااا اللي طلعوا أندل من الندالة نفسها
رغم إن منهم ناس كانت رموز و جامدة
و اللي كان عامل مسرحيات و بتاع و يقول ظلم لا و بتاع و منظرة
اتكلوا على الله
انتو اللي جتكو ستين نيلة
جتكوا القرف مليتوا البلد
0

إلى الشعب .. مكتوبة بلون الدم


أين يا شعب قلبك الخافق الحساسُ ؟
أين الطموحُ ، و الأحلام ؟
أين يا شعبُ ، روحك الشاعر الفنانُ ؟
أين الخيال و الإلهامُ ؟
أين يا شعب ، فنُّك الساحر الخلاق ؟
أين الرسوم و الأنغام ؟
إنّ يمّ الحياة يدوي حواليك
فأين المغامر المقدام ؟
أين عزم الحياة ؟ لا شيء إلا
الموتُ ، و الصمتُ ، و الأسى ، و الظلام
عمرٌ ميتٌ ، و قلبٌ خواءٌ ،
و دمٌ لا تثيره الآلام
و حياةٌ تنام في ظلمة الوادي
و تنمو من فوقها الأوهام
أي عيشٍ هذا ، و أي حياةٍ !؟
" رُب عيشٍ أخف منه الحِمامُ "

جزء من قصيدة من قصائد
" أبي القاسم الشابي "
لكن آخر بيت هو مقتبسه من المتني
بتاريخ
25 جمادى الثانية 1352
15 أكتوبر 1933

بتفكرني بشعب أعرفه
و ساعات بحس إنها شعووووووب
مش شعب واحد بعينه و بس
0

1 يناير 2011

معلقتش
و لحد دلوقتي مش هاعلق
بس عجبتني الأغنية

0

هي وجهة نظر

لسه قارية " حالة " على الفيس بوك لمحمود المصري
هو كاتب
" هي موناليزا جميله فعلا .. ولا احنا اللي شايفنها جميله ؟ "


بعد ما كتبت تعليقي افتكرت كلمة بقالي كتير بقولها غلاسة مع اصحابي
" وجهة نظر برضه "


فعلاً
وجهة نظر ...
إنك تحب الأكل حادق و هي تحبه دِلع


وجهة نظر ...
إن الصورة تعجبها لكنها مش عاجباكِ


وجهة نظر ...
إنه يحب السلة و انتَ بتحب القدم


وجهة نظر ...
إنكو الاتنين بتحبوا الأدب
انتَ بتحب الرواية
و هي بتحب الشعر


وجهة نظر ...
هي معارفها كتير و مبسوطة
و التانية معارفها قليلين و مستكتراهم


وجهة نظر ...
إن اللوحة تعجبك
لكن متعجبنيش


وجهة نظر ...
إني شايفة إنه بالنسبة لي عادي
و انتو شايفينه خارق و ... " انتي بتعملي إيه يا مجنونة ؟!!!؟؟ "


وجهة نظر برضه
لما أحافظ على الطفلة
و لما غيري يقتل الطفل جواه


و هي وجهة نظر


و كل واحد حسب نضارته
و أنا نضارتي فيها كل الألوان
حتى الرمادي و الاسود
انت بقى ؟
نضارتك لونها إيه ؟؟


و برضه و على كل حال
هي وجهة نظر
Back to Top