1 يناير 2011

معلقتش

و لحد دلوقتي مش هاعلق

بس عجبتني الأغنية

هي وجهة نظر

لسه قارية " حالة " على الفيس بوك لمحمود المصري
هو كاتب
" هي موناليزا جميله فعلا .. ولا احنا اللي شايفنها جميله ؟ "


بعد ما كتبت تعليقي افتكرت كلمة بقالي كتير بقولها غلاسة مع اصحابي
" وجهة نظر برضه "


فعلاً
وجهة نظر ...
إنك تحب الأكل حادق و هي تحبه دِلع


وجهة نظر ...
إن الصورة تعجبها لكنها مش عاجباكِ


وجهة نظر ...
إنه يحب السلة و انتَ بتحب القدم


وجهة نظر ...
إنكو الاتنين بتحبوا الأدب
انتَ بتحب الرواية
و هي بتحب الشعر


وجهة نظر ...
هي معارفها كتير و مبسوطة
و التانية معارفها قليلين و مستكتراهم


وجهة نظر ...
إن اللوحة تعجبك
لكن متعجبنيش


وجهة نظر ...
إني شايفة إنه بالنسبة لي عادي
و انتو شايفينه خارق و ... " انتي بتعملي إيه يا مجنونة ؟!!!؟؟ "


وجهة نظر برضه
لما أحافظ على الطفلة
و لما غيري يقتل الطفل جواه


و هي وجهة نظر


و كل واحد حسب نضارته
و أنا نضارتي فيها كل الألوان
حتى الرمادي و الاسود
انت بقى ؟
نضارتك لونها إيه ؟؟


و برضه و على كل حال
هي وجهة نظر

سأعيش

سأعيش رغم الداء و الأعداء
كالنسر فوق القمة الشماء
أرنو إلى الشمس المضيئة .. هازئاً
بالسحب ، و الأمطار ، و الأنواء
لا أرمق الظل الكئيب .. و لا أرى
ما في قرار الهُوةِ السوداء

هذا أنا
بقلم أبي قاسم الشابي
بعنوان
نشيد الجبار
15 ديسمبر 1933
- يعني كان كاتبهولي قبلي بيوم و 56 سنة -
^ـ^
27 شعبان 1352

و توتة توتة .. تخلص الحدوتة

كان ياما كان
في قديم الزمان
شجرة زيتون
نبتت في أمان
عاشت في ضلها
ياسمينة صغيرة
ضفايرها قصيرة
كان حلمها
مع غصن الزيتون
يكبر و يطول شعرها
و يديها الحمام
ريشه من عنده منورة
بياضها ناصع
وسط بحر شعرها
ياسمينة
فُـلاية صغيرة
لونها زي الياسمين
شعرها لون العينين
سواده من سواد الليل
في إيديها حب ريحان و ياسمين
زرعتها و حلمها تكبر وياها
و يطول وياهم شعرها
تطول الجدايل و تحلى الضفاير


ويوم بعد يوم
طار الحمام
و اتبقى غصن الزيتون
و تحت الغصن في ضله ياسمينه
مسقية بدم ياسمينة


يطول و يدور الزمان
و الحلم يبات حيران
وصل العنوان
لكن لا لقى أي ياسمين
و لا حتى غصن الزيتون


و توتة توتة
تخلص الحدوتة
بجرح و دم
و ع الخد يبات الدمع


حلوة .. ؟؟
أكيد ملتوتة

دنيا جنان

ياااااااه
اسم معبر
بصراحة
على أد ما بحب قلمي الرصاص السنون الروترينج اللبي اللي بقاله معايا سنين
- نص مللي على فكرة -
و على أد ما كنت بحب الأقلام الاحبر الملونة الاستادلر بتاعتي اللي كنت بعمل بيها الخرايط الذهنية عشان الامتحانات
- و كانت جامدة و سدت معايا سنتين على فكرة -

على أد ما أنا مبحبش أكتب اللي في بالي و جوايا بالاقلام
لإن معنى إني اكتب بالقلم إني أكتب على ورقة
- ما أكيد يعني مش هاكب على دراعي بلاش تعبقر -
و معنى إني أكتب على ورقة إنها هتبقى في مكاني
- أمال هتسافر لوحدها ؟؟ -
يعني ممكن تتفقس و حد غيري يقراها في وقت مش مناسب
- أصلهم بيقولوا المبدعين أكتر ناس فوضووين و الحدق يفهم -
اححححم احم احم
:D
لكن هنا
على الجهاز
ممكن حاجة أكتبها و تفضل مسودة - أو درافت عشان الترجمة
لمدة طوييييييييييلة
- اكتشفت من أسبوع على الفيس إن عندي " نوت " في الـ " درافت " عندي بقالها سنة
و لسه منشورة قريب
اللي هو الأسبوع اللي فات
:D :D :D :D
- حاجة مسخرة طبعاً بس عجبتني أوي -
فكرتني بحاجة كده
- و انتو مالكو بلاش إلة أدب :P :P -

المهم إني بجد حاسة الاسم ده معبر أوي
خصوصاً إن أنا واحشني الجنان أووووووي
و مكونتش لاقية اسم فيه جنان عاجبني
بس ده لا بأس بيه حالياً
شغال
^ـ^

من .. قلمي " سابقاً "
إلى .. دنيا جنان " اللي وحشني أوووي "
^ـ^

ثقافة التطوع .. فخور بأني متطوع

" أنا متطوع في .... "

" بند في السي في : الأعمال التطوعية "
متطوع - تطوع - جمعية خيرية - منتطوعين - ... إلخ إلخ إلخ
كلمات كتير بقت مألوفة بالنسبة لودانا
و في نفس الوقت بنبص لصاحبها بنظرة إجلال و تقدير
بس يا ترى .. حضرة " المتطوع " ده
عارف بجد يعني إيه " تطوع " ؟؟
و للا هي موضة و ماشي وراها ؟
و لا أهي حاجة " تقضية وقت " و خلاص ؟
و للا " حاجة بنروحها أنا و صحابي سوا " ؟

أنا باتكلم بجد عن حاجة كتير بحس غنها هتفقع مرارتي و هتموتني في مكاني
بالذات لما ألاقي حد أدامي من فصيلة " أصل حضرتشك أنا متشطوع " و بيتمنظر
مش هاتكلم المرة دي أوي يعني إيه ثقافة التطوع الصح و الكلام ده
خلينا نشوف الهنا اللي احنا فيه الأول

دلوقتي في ناس بتتحسب على المتطوعين نفر
لكن أسلوبها في الشغل مستفز
يبقى أول ما الواحد من الروس - الرؤوس - دي ييجي المكان بتاع العمل التطوعي ده
تلاقيه متحمس ما شاء الله عليه و أنا أقدر أعمل و أسوي معاكو
و تديله أبليكيشن تلاقيه بسم الله ما شاء الله عملك علامة صح في كل المجالات اللي في الورقة
ماشي يا سيدي
يديم عليك من فضله و تستمر معانا
" لأ إزاي ؟ إن شاء الله أنا معاكو دايماً و في كل حاجة "
جميل يا سيدي ربنا يخليكي للشعب المتطوع

نيجي بقى للجد

صاحبنا ده تعالوا نبص عليه كده
أول أسبوع ما شاء الله عليه
أينعم مواعيده بايظه
و يقولك خمسة يجيلك سبعة و نص
تقوله عشرة الصبح يجيلك بعد صلاة الضهر
" أصلي قولت أصلي الضهر و أنزل "
و انت طبعاً متقدرش تفتح بقك بعشر حرف
يعني الراجل يسيب صلاته عشان يجيلك
اخص عليك .. مكونتش أفتكرك كده

المهم نرجع للأخ صاحبنا " المتشطوع " ده
تاني أسبوع شغال

التالت ماشي

الرابع معقول

ندخل بقى في اللي بعد كده - بالذات لو الأمور بدأت تكبر و الشغل يكتر
ييجي متأخر أوي .. تحاسبه و للا حتى تعاتبه
" أنا جاي متطوع و لو مش عاجبكو أمشي "

ميعملش شغله .. تحاسبه و للا حتى تعاتبه
" أنا متطوع مش موظف و مبخدش مرتب "

يا فرحتي
أمال فين بقى متطوع و تبع جمعية مش عارفة إيه و الحوارات دي ؟؟

بذمتكو
مش حاجة تفقع المرارة
بالذات بقى لما تلاقيه بيعمل راسه براس المشرف عليه بحجة "إن ده " عمل تطوعي و كلنا زي بعض محدش أحسن من حد و محدش يحاسبني "

اتفقنا مش هنتكلم على ثقافة التطوع الصح و الكلام ده
بس في كلمتين لازم يتقالو
كلمة " أنا متطوع " دي معناها مش سهل
دي معناها إنك شغال عند اللي مينفعش تتنك عليه و للا تقوله " أنا جاي بمزاجي و أقدر أمشي "
انت سعادتك شغال عند ربنا
عارف يعني إيه ؟
يعني انت بمزاجك روحت تشتغل عند اللي خلقني و خلقك
روحت عند اللي لما تقرب منه خطوة يتقرب منك ذراعاً
و لو روحت له مشي بيجيلك هو هرولة
فاهم يعني إيه ؟
يا متطوع ؟
يا شغال عند ربنا ؟

تاني حاجة
أما الباشـ"ـمتشطوع " ده يقول للمشرف عليه " أنا جاي متطوع بمزاجي و لو مش عاجبكو أمشي " - هو أكيد مش بالصورة دي بس ده معناها حتى لو كانت متضمنة في الفعل مش الكلام

سيادتك لازم تفوق حضرتك
انت اللي محتاج الناس دي مش هي اللي محتاجاك
انت اللي محتاج للثواب عشان كل واحد عامل ذنوب ميقدرش عليهها سلسلة جبال الألب نفسها و لا التبت و الهيمالايا و إفرست
الناس دي مقدمالك فرصة من دهب إنك تصفي نيتك لله و تاخد ثواب يمحي شوية من البلاوي اللي عملتها في حياتك و الذنوب المتلتلة فوق كتافك

و بعدين انت لو مشيت و سيبت المكان
ألف من هيتمنى ييجي مكانك

يعني من الآخر
الناس دي مش خسرانة حاجة
لإنك لو فكرت
هتلاقي إن اللي ممشيها لا انت و لا هم و لا أي مخلوق على وش البسيطة
ربنا اللي بييسرها و بيخلي المركب تسير و الدنيا تمشي
و تلاقي الناس مبسوطة و قريبة من بعضها

و انت الخسران في حاجة كمان
المكان اللي بيقوم ع الشغل التطوعي لو انت سيبته
يبقى بتضيع على نفسك فرصة كبيرة أوي إنك تلاقي ناس نفسها صافيه أوي
بتحبك لله و في الله
لا ليها عند مصلحة و لا مستنية منك مقابل

و بأمانة
خسارة إن حد يضيع فرصة زي دي بتفكير زي ده
و خصوصاً إنهم هييجوا في فترة يعينوك و تعينهم ع الطاعة و العبادة
و لو ضيعتهم
يبقى ساعتها بقى اللي جبته لنفسك

- الكلام فيه شوية مبالغات في الجملة المنصوصة لإن قصدي منها المعنى المتضمن مش الكلام الحرفي اللي بيتقال -
- أعتذر لأي حد ضايقه كلامي و لا يتنطبق عليه وصف " المتشطوع " لإن الموضوع ده فعلاً بيستفزني جداااا و لسه متعرضه ليه من يومين -

2010

أمة لا إله إلا الله بتودع السنة دي
الكل حاسس إنها غير كل سنة
و مش مجرد إحساس
لأ أكتر من كل سنة


بصراحة بالنسبة لي
بدأت نوعاً ما بشوق مني ليها
و إني منتظرة تكون من أسعد سنين حياتي
و ما انكرش إن حصلت فيها حاجات من أجمل ما كنت ممكن أحلم بيه


بس ختمت بكمية حاجات مؤلمة و شنيييييييييييعة
خلتني مش طايقاها
و لا طايقة عيد ميلادي اللي جه في آخرها زي كل سنة في نفس المعاد


2010
بدأت إني طالبة في آخر سنة في الجامعة
بعدها قراية فاتحتي - اللي مكنتش مستوعبة إيه اللي بيحصل و كنت في عز كسوفي اللي معرفتوش عني طول 20 سنة قبلها
:D
اتخرجت  - يااااااااااااااااااه أخييييييييرا
اتخطبت - في اليوم اللي كنت فيه مسطولة و حاسة إنهم بيتكلمو عن حد جاي يعمله خطوبته في بيتنا لكن أكيد ده مش أنا
:D :D
و أخبار حلوة عن ناس بحبها
كان في في النص خبر كتب كتاب واحدة من أغلى الناس عليا
و خطوبة واحدة كمان بحبها مووووووووت
ربنا يسعدكو يا رب و يهنيكي في كل وقت
و قرب الآخر كان كتب كتاب واحدة من أعز صحباتي - و اللي داقت على إيدي المر في الكلية و شغلها .. فاكرة يا سمسم :-*


2010
بدأت بخبر كان مقلقنا بس قولنا خير و يعدي إن شاء الله
اتنزحزت شوية بخبر نزل عليا أسوأ من الصاعقة
لحد دلوقتي فاكراه بإحساسه
فاكرة لما اتنفضت من على السرير لما سمعته و أنا بقول " إييه ؟ "
و مكنتش طويلة لإني كنت مقتنعة إني سمعت غلط أو إني خرفت
إحساس إنك اتضربت بصاعقة كهربا أو برق في قلبك
و إن جواك فرااااااااغ
عارفين الفضاء طبعاً و شوفناه كلنا ع التلفزيون و اليوتيوب أو أي حتة
هو ده
ده اللي أنا حسيته جوايا شوية كده
بعدها بدأت دموعي تنزل حتى لو كنت بدأت أهدى
خبر لحد دلوقتي بيوجعني
بس بصراحة
حاسة إنه الحمد لله أوي
مش مجرد كلمة كالمعتاد من الناس في الموقف ده
لأ بجد الحمد لله
كان رحمة من ربنا بعد تعب طويييييييييييل
بس وجعني إني سمعت الكلمة اللي بكرها
مش لمعناها
بس لمناسبتها
أول مرة سمعتها سبت اللي كنت بكلمه و زعقت في وشه و قولتله " لأ أبوس إيديكم مش عايزة أسمع الكلمة دي "
و سيبته و مشيت
أنا عارفة إنه مينفعش و ميصحش
بس مكنش في حل تاني وقتها
كان نفسي أوي - و لحد دلوقتي - أحكي حاجات كتيييير
و مستنية اللحظة اللي أحكي فيها كل اللي عندي لإنه فعلاً كتير
و كان مستنيه
و كان مخليني مستنياه عشان أفرحه
سبحان الله




2010
السنة اللي عرفت فيها ولادي
ملك
ريتاج
عمر و حمزة
محمد مجدي
محمد عبد الله
علي
سارة
كنزي
يوسف
و صفية و محمود و محمد مصطفى
زينة
مريم علاء
مريم محمد - اللي مجتش غير يومين في الآخر معايا و أول ما شافتني جاتلي جري و حضنتني حضن كبير أدام المدرسة التانية
أنس
سفيان
ندى
سلمى - سلمى الشيخ محمد حسان و هي مقتنعة إن الشيخ جزء لا يتجزأ من اسمها ، دي بنت الشيخ بجد ، الشيخ محمد حسان
اللي وحشوني بجد أووووووووي


عرفت هديل مدرسة الانجليزي و مدرسة الفصل
إنسانة جميلة أوي و بحها أووووي
أسماء البنوتة المساعدة اللي برضه سكرة
- كنا دايماً بنقول هنترفد كلنا في يوم واحد -
:D
بس الحمد لله ماترفدناش
بس أنا سبت المدرسة
لإن بكل بساطة
أنا دراعي مبيتلويش لأي سببٍ كان
و السوبر فايزر عندنا في القسم كانت إنسانة ما يعلم بيها إلا ربنا و الحمد لله إن أنا عرفت أستفزها حبة حلوين و أنا ماشية
- طيبة أوي أنا مش كده -
:D


هي دي 2010 معايا
بحلوها و مرها
شوية من ده و شوية من ده


بس بسبب كل ده
الناس كلها تقريباً مش عاجباها السنة
و ناس كارهينها
و ناس بتقولها الحمد لله إنك مش راجعة


أنا العكس
أنا بقولها بحبك أوي
2010
سنة مالكيش زي
هتفضل معلمة فيا و معايا جامد
لإنها مش زي أي سنة في حياتي
2010
سنة من أغلى سنين حياتي عليا
رغم حزنها و ألمها
بفرحها و بسمتها
بكل ما فيها
بحبك أوي يا 2010


و مستنياكي برضه
يا 2011
^ـ^

اللهم لك الحمد على ما أعطيت و ما أخذت و ما أنعمت به علينا و ما ابتليتنا به

" عجبت لأمر المؤمن كل أمره خير ، إن أصابه خير شكر كان خيراً له ، و إن أصابه ضر صبر فكان خيراً له